Кәсіпкерлер тәулік ішінде залалды өтеуге 200-ден аса өтініш берді

«Атамекен» ҰКП деректеріне сәйкес, 2022 жылғы 26 қаңтардағы сағат 16:00-дегі жағдай бойынша кәсіпкерлер жаппай тәртіпсіздіктерден келтірілген залалды өтеуге 203 жаңа өтініш жіберген. InfoKazakhstan.kz сайтында осы уақытқа дейін 673 өтініш жүктелді.

«Атамекен» ҰКП деректеріне сәйкес, 2022 жылғы 26 қаңтардағы сағат 16:00-дегі жағдай бойынша кәсіпкерлер жаппай тәртіпсіздіктерден келтірілген залалды өтеуге 203 жаңа өтініш жіберген. InfoKazakhstan.kz сайтында осы уақытқа дейін 673 өтініш жүктелді.

Берілген өтінімдердің 261-іне электронды цифрлық қолтаңбамен (ЭЦҚ) қол қойылған. Оның 91%-ы (237 өтінім) Алматы кәсіпкерлеріне, қалған 9%-ы Шымкент қаласы, Алматы, Жамбыл, Шығыс Қазақстан және Ақтөбе облысына тиесілі.

Өтеу түріне қарай 240 өтініш жеңілдетілген механизм бойынша, қалғаны сот сараптамасының қорытындысы негізінде қаралады.

261 өтінімнің 68%-ы тауар-материалдық құндылықтардың залалын көрсетіп толтырылған, 13%-ы жылжымайтын мүлік, 3%-ы жылжымалы мүлікке қатысты берілген. Ал өтініштердің 16%-ында залалдың түрі көрсетілмеген.

Айта кетейік, залалды өтеуге өтінішті InfoKazakhstan.kz сайтында қалдыруға болады. Ол үшін сайттың «Маңызды ақпарат» бөліміне өтіп, егжей-тегжей нұсқаулықпен және қажетті құжаттар тізімімен танысуға болады.

Залалды өтеу туралы өтініштерді Өңірлік комиссиялар күнтізбелік 5 күн ішінде қарайды. Мақұлданған жағдайда ұсынылған мәліметтер мен құжаттар негізінде Өңірлік комиссия айқындайтын мөлшерде қаражат бөлу туралы шешім шығарылады.