Зайсан ауданының фермерлері дабыл қағуда
Агроөнеркәсіптік секторда кәсіби кадрлар жетіспейді. Бұл туралы Зайсан ауданы шаруа қожалықтарының басшылары ШҚО бойынша Қазақстан фермерлер қауымдастығының төрағасы Самат Қыдырмолдамен болған кездесуде мәлімдеді.
«Шопандар, малшылар, механизаторлар, зоотехниктер, жылқы өсірушілер, ветеринарлар табылмады», - деп атап өтті шаруа қожалықтарының басшылары.
Шағын фермалар үшін жалақы да үлкен проблема болып отыр. 200 мың теңге жалақы жетпейді, ал олар бұдан артық ұсына алмайды, дейді фермерлер.
ШҚО Кәсіпкерлер Палатасы Зайсан аудандық филиалының директоры Қанат Әбдіғалиевтің айтуынша, бұл мәселені аудан фермерлері көптен бері көтеріп келеді.
«Осы позицияларда жұмыс істегісі келетіндерді табу қиын, олардың жалақысы да төмен, ал кадрларсыз фермерлер мал басын көбейте алмайды», - деп атап өтті Қанат Әбдіғалиұлы.
Сонымен қатар, С.Қыдырмолда агроөнеркәсіптік сектор қызметкерлерін оқыту үшін қысқа мерзімді курстарды енгізу ұсынылып отырғанын хабарлады.
«Арнайы оқу орындарында немесе оқу орталықтарында агроөнеркәсіптік сектор мамандықтары бойынша курстар ашу мәселесі пысықталуда және курстардан өткені туралы сертификаттар алу міндетті. Алдын ала жұмыс берушімен келісім-шарттар жасасуға болады. Біз сондай-ақ мемлекет тарапынан кадрлардың осы санатына ішінара еңбекақы төлеуге субсидиялар төлеу мәселесін көтереміз». - деді Самат Қыдырмолда.
Ол ауыл шаруашылығы қызметкерлерінің санатын қайта қарау, жағдай жасау, әлеуметтік пакетті ойластыру қажет екенін айтты.
«Біз агроөнеркәсіптік сектор саласының қызметкерлері үшін зиянды өндіріс қызметкерлерімен қатар, 55 жаста зейнетке шығу мәселесін көтеруді жоспарлап отырмыз», - деді С.Қыдырмолда.
Сонымен қатар, шаруа қожалықтарының өкілдері ауыл шаруашылығы жерлерін суару, Үйдене су қоймасын жөндеу, сондай-ақ ҚХР-да мал шаруашылығы өнімдерін сату мәселесін көтерді.
Қауымдастық төрағасының айтуынша, бұл мәселелердің барлығы ұйымның жаңа тұжырымдамасына енгізіліп, пысықталатын болады.
Пікір қалдыру:
Пікірлер: