«Атамекен» кәсіпорындардағы төтенше оқиғалардың алдын алу әдісін ұсынды
Жазатайым оқиғалардың алдын алу жұмыстарын кешенді жүргізу, осы бағытта барлық мүдделі тараптарды тарта отырып, бизнесті артық тексерулерден арылту, бірыңғай онлайн-портал құруға мүмкіндік береді.
«Атамекен «ҰКП Басқарма төрағасының орынбасары Олжас Ордабаев Қарағандыда өткен «Компаниялардың әлеуметтік саясаты: даму тәжірибесі мен болашағы» атты республикалық семинар-кеңесте осындай пікір білдірді.
«Біздің ойымызша, платформалық шешім құру туралы мәселе пісіп-жетілді, оның негізінде жағдайға толық мониторинг жүргізу, шаралар қабылдау, жұмыс орнындағы жазатайым оқиғалардың алдын алу және оларды болдырмау мүмкіндігі зор. Біз бұл мәселені кәсіподақтар Федерациясы мен Еңбек және халықты әлеуметтік қорғау министрлігіндегі әріптестерімізбен талқылауды бастадық. Бірыңғай онлайн-портал жұмыс берушілер, кәсіподақтар, еңбек инспекциялары штаттан тыс жағдайларды, заң бұзушылықтарды, қақтығыстарды, тексеру нәтижелері мен ұсынымдарды көрсете алады, жазатайым оқиғаларды болдырмау жөніндегі жұмысты сапалы күшейтуге мүмкіндік береді»,-деп мәлімдеді Олжас Ордабаев.
Спикер осы жобаға тартылған барлық ұйымдар үшін ашылған портал штаттан тыс жағдайларға жедел әрекет етуге, жолсыздықтардың белгілері мен фактілері болған жағдайда көшпелі бақылауды жүзеге асыруға мүмкіндік беретінін атап өтті.
«Қалған жағдайларда тек камералдық бақылау жүргізуге, сондай-ақ талдау жүргізуге болады, бұл жарақаттың алдын алу және алдын алу шараларын жүргізуге жол ашады. Осылайша, еңбекті қорғаудың жай-күйі және еңбек қатынастары туралы ақпаратты дер кезінде енгізетін бизнес субъектілері тексерулерден босатылуы мүмкін. Бұл жүйені енгізу бюджеттік шығындарды қысқартуда тиімді және онлайн құралдарды құруға арналған шығындарды жабады», - деді Олжас Ордабаев.
Шара сондай-ақ «жұмыс беруші-кәсіподақ-еңбек инспекциясы» арасындағы өзара қарым-қатынастарындағы тепе-теңдік жүйесін нығайтады. «Егер осы жағдай туралы жұмыс беруші порталда хабарламаса, онда оны міндетті түрде кәсіподақ істейді», - дейді ҰКП Басқарма төрағасының орынбасары.
Қазақстан Республикасы Премьер-Министрінің бірінші орынбасары Асқар Мамин, өз кезегінде, бүгін Үкімет қызметкерлер, жұмыс берушілер мен мемлекет арасындағы диалогтың сапасы мен қолжетімділігін түбегейлі арттыру бойынша барлық қажетті шараларды қолданатынын мәлімдеді.
«Соңғы бірнеше жылда еңбек қақтығыстарының саны бес еседен астам азайды. Осы бағыт бойынша одан әрі ілгерілеушілікті қамтамасыз ету үшін нақты шаралар қабылданып отыр: еңбек жанжалдарының алдын алу бойынша мемлекеттік органдар мен әлеуметтік серіктестердің өзара іс-қимыл алгоритмі әзірленді, жұмыс берушілердің республикалық бірлестіктері жұмысқа белсенді қосылды. «Атамекен» ҰКП базасында еңбек омбудсмен институты құрылды. Қызметкерлердің уақытылы және толық еңбекақы төлеу құқығын қорғау да күшейтіледі», – деді ҚР Бірінші вице-премьері.
Семинар-кеңес барысында сондай-ақ қауіпсіз еңбек жағдайларын қамтамасыз ету, қызметкерлерді жаппай жұмыстан босатуға жол бермеу, шетелдік құрамды компанияларда қызметкерлердің еңбек құқықтарын іске асыру кезіндегі кемсітушілік фактілері туралы сөз болды.
Өз кәсіпорындарындағы корпоративтік әлеуметтік жауапкершіліктің дамуы туралы «АрселорМиталлТеміртау» АҚ, «Қазақмыс» ЖШС, «Евразийская группа» ЖШС, «Қазмырыш» ЖШС бірінші басшылары, сондай-ақ тау-кен металлургия өнеркәсібі саласындағы әлеуметтік әріптестік пен еңбек қатынастарын реттеу жөніндегі салалық комиссияның төрағасы Роман Скляров айтып берді.
Республикалық деңгейдегі іс-шара екі бөлімнен тұрды. Түске дейін әлеуметтік әріптестік пен еңбек қатынастарын реттеу жөніндегі үшжақты комиссия кәсіподақтар қызметі мен рөлі мәселелерін қарады. Ал түстен кейінгі жиын ҚР Премьер-Министрінің бірінші орынбасары Асқар Маминнің, ҚР Еңбек және халықты әлеуметтік қорғау министрі Мәдина Әбілқасымова және облыс Әкімі Ерлан Қошановтың қатысуымен өтті.
Пікір қалдыру:
Пікірлер: