«Атамекен» Комитетінде тауар өндірушілерді қолдау және ШОБ дамыту мәселелері талқыланды
Сейсенбі күні Тахмина Нағұманованың төрағалығымен өткен «Атамекен» Ұлттық кәсіпкерлер палатасы Төралқасының Өңдеу өнеркәсібі комитетінің отырысында өңірлік кәсіпкерлер палаталарының салалық кеңестерінің қатысуымен отандық тауар өндірушілерді (ӨӨ) қолдау және шағын және орта бизнесті дамыту мәселелері талқыланды.
Күн тәртібіндегі бірінші мәселе СТ-KZ пен Өнеркәсіптік сертификатты алмастыратын жаңа OTӨ тізілімінің тұжырымдамасы болды. Индустрия және құрылыс министрлігінің өкілі тізілімнің басты мақсаты отандық нақты өндірушілерді дәл анықтау болатынын жеткізді. Бұл қадам мақсатты қолдау көрсетіп, жосықсыз өндірушілермен күрес құралына айналады, деді спикер.
Техоперациялар бойынша өнімді оқшаулауды бағалау технологиясына ерекше назар аударылды. Қазірдің өзінде 1800-ден астам операция әзірленді және бұл жұмыс Қазақстанда өндірілетін барлық тауарлық бағыттар бойынша жалғасады, деп атап өтті ӨҚМ.
Ұлттық палата өкілдері сала мамандарының қатысуымен жергiлiктi жерде бағалаудың маңыздылығына тоқталды. Бұл өндірісті объективті бағалауға мүмкіндік береді. Осы ретте бизнес-қоғамдастық сала мамандарының қажетті технологиялық процестерді объективті бағалай алатынын және нақты өндірушілерді анықтай алатынын жеткізді.
Сондай-ақ ҰКП технологиялық операцияларды ескере отырып, ел ішіндегі құн үлесін (ЕҚҮ) есептеу әдістемесін қарастыруды ұсынды.
Жиында Ұлттық палата ұсынған шағын және орта бизнесті дамытудың экожүйесінің таныстырылымы болды. Ол үш бөлімді қамтиды: микро және шағын бизнесті дамытудың жаңа тәсілдері, орта бизнесті дамыту тәсілдері және мемлекет пен бизнестің өзара әрекеттесуінің цифрлық экожүйесін құру (eGovbusiness порталы/
Қызметтер нарығы).
Микро және шағын бизнесті дамыту шеңберінде әрбір өңірде/ауданда дамытудың басым бағыттарын құру және қаржылық, қаржылық емес қолдау шараларын қамтитын кешенді шешімдерді тұжырымдау ұсынылады. Сондай-ақ, әкімдіктердің тиімділік рейтингін үш көрсеткіш бойынша: қызметкерлер саны, жекелеген басымдықтар бойынша төленген салық сомасы және «Іскерлік ахуал» тәуелсіз рейтингінің нәтижелерін ескере отырып жаңарту мәселесі көтерілді.
Орта бизнесті дамыту шеңберінде мемлекеттік қолдау шараларын одан әрі қамтамасыз етудің үш ашық және түсінікті бағытын құру ұсынылады: ел ішіндегі құн үлесі (ЕҚҮ), технологиялар трансферті және экспортқа бағдарлану. Бұл бағыттар мемлекеттік ресурстарды тиімдірек бөлуге және кластерлік өндірісті дамытуды ынталандыруға мүмкіндік береді.
Экожүйенің үшінші бағыты – кәсіпкерлерге арналған eGovbusiness порталын/Қызмет көрсету нарығын құру. Портал мемлекеттік қолдаудың барлық шараларын бір жерде біріктіріп, бизнеске қолайлылықты қамтамасыз етіп, оның мемлекетпен өзара іс-қимылын жеңілдетуі керек.
Сонымен бірге, отырыста ҰКП-ның алдағы Съезіне проблемалық мәселелер ұсынылды.
Жиын соңында Өңдеу өнеркәсібі Комитетінің төрағасы Нағұманова еліміздегі бизнес-климатты жақсарту бойынша ұсыныстарды талқылауға және қалыптастыруға кәсіпкерлердің белсенді қатысуының маңыздылығын атап өтті.
Пікір қалдыру:
Пікірлер: