КӘСІПКЕРЛЕРДІҢ ҰСЫНЫСЫ ҰМЫТ ҚАЛҒАН ЖОҚ
Енді тұп-тура 6 күннен кейін, яғни 29 мамырда Астанада үш елдің президенттері Еуразиялық экономикалық одаққа қол қояды. Аталған ұйымның шарттары бірнеше рет толықтырылып, соңғы нұсқасы Ұлттық кәсіпкерлер палатасының сайтына 15 мамырда қайта жарияланды.
Сонымен, жаңа жобада Қазақстан тарапының мүдделері қаншалықты ескерілді?
– Құжат бізге өткен жылдың қарашасынан берілгелі бері оны талқылау үшін 30-дан аса түрлі кеңес отырыстарын ұйымдастырдық, – дейді кеше елордада Орталық коммуникациялар қыметінде брифинг өткізген Ұлттық кәсіпкерлер палатасы басқарма төрағасының орынбасары Рахым Ошақбаев. – Шартты талқылау барысында біздің топ Мәскеу мен Минск қаласында болған арнайы комиссияның да отырыстарынан қалмай қатысты. Мәтінмен танысып шыққан кәсіпкерлер тарапынан ескертулер мен ұсыныстар молынан түсті. Шарттың барлық бөлімдері бойынша жинақталған ескертпелерді топтастырып, Үкіметке 120-дан аса ұсынысты жолдадық. Нәтижесінде, оның 90 пайызы қазақстандық келіссөздер тобының ресми позициясы ретінде Шарт жобасына енгізілді.
Кәсіпкерлер палатасы өз әріптестерін ел экономикасына тікелей әсер ететін жобаны жан-жақты талқылауға үнемі жұмылдырып келіпті. Жобаның 6 редакциясын да дер кезінде алдыртып, жалпы қоғамға танысуға ұсынып отырған. 170-тей мақала жариялап, елді ортақ пікір бөлісуге шақырыпты. Ошақбаевтың мәлімдеуінше, ЕАЭҚ заңнамасын қалыптастыруға қатысу бойынша Үкімет кәсіпкерлерге орасан зор мүмкіндік берген. Салыстырмалы түрде айтқанда, ресейлік және беларусьтық кәсіпкерлер Шартпен тиянақты түрде таныспапты да. «Оның қасында Үкімет басшысының бірінші орынбасары Бақытжан Сағынтаевтың жетекшілігімен бизнес-қауымдастықтың бастамаларының басым бөлігі ескеріліп, маңызды құжатқа енгізілді. Енді осы қолдаудың аясында отандық бизнесмендер одақ аясында бәсекеге қабілетті деңгейде жұмыс істеуге жұмылғаны жөн. Және солай болады деп сендіргім келеді» дейді Ошақбаев.
Пікір қалдыру:
Пікірлер: