Көліктік транзиттің әлеуеті артады
Кеше Орталық коммуникациялар қызметінде Ұлттық кәсіпкерлер палатасының Мемлекеттік сатып алулар және жергілікті қамту департаменті директорының орынбасары Айгүл Қоңыртаева баспасөз мәслихатын өткізді. Ол шағын және орта бизнестің интеграциялық үрдістердегі рөлі туралы әңгімеледі.
Шараға «ҚТЖ» ҰК» АҚ Корпоративтік даму жөніндегі басқарушы директоры Еркін Жусанбаев пен ұлттық компанияның Экономикалық интеграция департаментінің директоры Әлия Жұмабаева да қатысып, Еуразиялық экономикалық одақ аясындағы теміржол қызметі туралы айтты. Мәслихат спикерлері экономикалық интеграцияның кәсіпкерлерімізге өте тиімді болатынына назар аударды. «Еуразиялық экономикалық одақ бизнесмендер үшін тиімді. Былтырғы жылы Кеден одағы елдеріне экспорт айтарлықтай артты. Атап айтар болсақ, трансформатор 7,4, трактор 5,7, жүк көліктері 3,7 есе көбейген. Еуразиялық экономикалық одаққа кіру арқылы отандық бизнес өкілдерінің бәсекелестікке қабілеттілігінің артатындығы да мәлім. Соның негізінде біздің бизнес әлемдік нарық талаптарына бейімделуі керек», деді А.Қоңыртаева.
Осы арада, одақ аясында отандық бизнес өкілдері 200 млрд. доллардың нарығына қол жеткізетіндігін де айтып өткен жөн. Бұл ғаламат нарыққа Ресей мен Беларусь елдерінің муниципалдық сатып алуларына қатысу арқылы мүмкіндік алады. Ал біздің мемлекеттік сатып алуларға Кеден одағының елдері бұрыннан қатысып келе жатыр екен. Әйтсе де, сатып алу кезінде өзіміздің отандық жабдықтаушыларға белгілі бір артықшылықтар беріліп келген. Енді экономикалық одақ аясында бірыңғай мемлекеттік сатып алу орталығы жасалғандықтан, үш елдің де бизнес өкілдері бірдей деңгейде мемлекеттік сатып алуға қатысатын болады.
Еуразиялық экономикалық одақ аясында теміржол билетінің құны қымбаттамайды. «Еуразиялық экономикалық одақты құру кезінде көлік қатынастарына қатысты келісімшартта одақ ішінде теміржолдың тарифін теңестіру мәселесі қарастырылып, бірдей болсын делінген еді. Ресей теміржолының қызметі бізден 2-2,5 есе қымбат екені мәлім. Осыны ескеріп, біз бұл шешімге келіспедік. Сөйтіп, әр ел өзінің көлік қызметінің ақысын өзі шешетін болды», деді Е.Жусанбаев.
Сондай-ақ ол, Еуразиялық экономикалық одақ көліктік транзиттің әлеуеті мен бәсекелестікті арттыратындығын да айтты. Қазақстан, Ресей және Беларусь инфрақұрылымдарының шекаралас учаскелерінде тәуелсіз тасымалдаушыларға теңдей мүмкіндік ашу мәселесі қарастырылып отырғанын да ортаға салды. Аталған телімдер Қазақстан мен Ресей аумақтарында локомотивтерге қызмет көрсетілетін орындардың шекарасы ретінде анықталатын көрінеді. Сөйтіп, тасымалдаушылар теңдей жағдайда жұмыс істеу мүмкіндіктеріне ие болады екен.
Дерекнамасы: Егемен Қазақстан
Пікір қалдыру:
Пікірлер: